Statens hus, Vadsø
Statens hus blei oppført 1960–63 som kontorlokale for den statlege forvaltninga i Finnmark. Arkitekt: Berner & Evensen. Det er ått og forvalta av Statsbygg.
Store delar av praktbygningane i Finnmark gjekk tapt under brannane tyskarane sette i gang i 1944–1945. Det gjaldt òg Amtmannsgården i Vadsø og Vadsø kirke. Begge desse to bygningane som symboliserte den profane og sakrale makta, låg plasserte side om side på Galgebakken over byen.
Etter krigen blei Statens hus (1960–63) og den nye kyrkja bygde opp igjen på det same området. Statens hus har, som Vadsø kirke, ein monumental karakter som dominerer busetjinga i området. Bygningen er teikna av arkitektane Berner & Evensen og representerer ein form- og materialbruk som er typisk for gjenreisingsarkitekturen.
Statens hus, Vadsø. Foto: Statsbygg
Statens hus rommar kontorlokale for fylkesmannsembetet og andre statlege funksjonar som politi, tollvesen, Statens naturoppsyn og Riksrevisjonen. Fylkesmannen er representanten til Kongen og regjeringa i fylket og skal arbeide for at statlege vedtak, mål og retningslinjer blir følgde opp.
Statens hus i Finnmark synleggjer på ein god måte rolla staten har i gjenreisinga av Finnmark, og i styringa og utviklinga av landsdelen etter krigen.