Statsbygg

Vedlikehald er vern. Det er betre å halde ved like enn å reparere, og det er betre å reparere enn å byte ut. Jamleg vedlikehald er den beste og billigaste forma for bygningsvern. Dersom også nye bygningar blir riktig vedlikehaldne opp gjennom åra, kan dei bli verdifulle kulturminne for seinare generasjonar. Mest mogleg av dei opphavlege eller gamle bygningselementa og detaljane bør bevarast så langt det er råd. Godt vedlikehald bevarer verdiar, både økonomiske og kulturhistoriske. 

Hald utkikk – unngå skade. Skadeførebyggjande tiltak er viktig. Gjer brukarane medvitne om dei kvalitetane bygningen har. Vern bygningen mot fukt, brann og slitasje. Systematisk og regelmessig gjennomgang av bygningen kan avsløre potensielle eller byrjande skadar. Bruk alle sansar. Tenk framover. Kva for bygningsdelar er sårbare? Kva kan hindre at det oppstår skade? Unngå å innføre nye materiale ved utbetring og vedlikehald, det kan skade meir enn det reparerer.

Lag dokumentasjon. Før logg over funn, vurderingar, tiltak og materialbruk. Skriv ned kva fabrikantar som blir brukte. Denne kunnskapen om bygningen vil komme etterfølgjaren din til gode. Kva skjedde? Kva blei gjort? Kvifor? Med kva materiale? Slik dokumentasjon kan avverje mykje framtidig hovudbry – og repetisjon av feil. Velmeinte, men feil utførte utbetringar og feil materialbruk kan føre til nye skadar. Lag ein vedlikehaldsmanual som følgjer bygningen.

Originalen er betre enn kopien. Aksepter gjerne synleg patina på materiale og overflater dersom det fungerer bygningsteknisk. Skeivskapar kan behaldast. Dersom noko må endrast eller skiftast ut, kan det vere betre å føye til noko nytt enn å fjerne originale bygningselement. Utskifting skal berre gjerast dersom det ikkje er mogleg å reparere skadane, og då som nøyaktig kopi, material- og handverksmessig. Ein "nesten-kopi" kan bli heilt feil.

Ha diskusjonspartnarar – søk råd.  Ingen einskildperson kan alt. Ikkje gjett på løysingar. Søk råd hos fagfolk. Spør heller ein ekstra gong, i staden for å gjere tabbar. Verneverdige bygningar er ikkje-fornybare ressursar, så alt må gjerast riktig.

Gjer færrast mogleg inngrep. Prøv å ta vare på alle delar av bygningen. Inngrepa ved vedlikehald eller utbetring må vere så små som mogleg. Det er like viktig å ta vare på skjulte delar av bygningen (konstruksjon) som synlege (overflatene). Ikkje fjern historiske lag i bygningen (f.eks. gamle tapet) utan å ta kontakt med fagfolk innan kulturminnevern.