LEIAR:
Vern om historia vår

Bygningar har ei historieforteljande kraft, og vi oppsøkjer gjerne bygningar når vi vil vite meir om fortida og historia. Statsbygg har brei erfaring med å ta godt vare på bygg og eigedommar, noko som også kjem til nytte når dei kulturhistoriske eigedommane i Noreg skal vernast. Statsbygg forvaltar ei rekkje eigedommar som har stor symbolverdi og er viktige for heile nasjonen. Vi ynskjer å ta omsyn til dei kulturhistoriske verdiane og forvalte eigedommane på ein heilskapleg måte.

Regjeringa har, i ein kongeleg resolusjon som blei vedteken 1. september 2006, gitt overordna retningslinjer for korleis statlege kulturhistoriske eigedommar skal forvaltast.

I Statsbygg er det danna ei eiga faggruppe som skal arbeide med kulturminnevern. Første fase i dette arbeidet har vore å vurdere kva for bygningar som er verneverdige. Som ei vidareføring av dette er det sett i gang eit arbeid med å lage landsverneplanar for statlege kulturhistoriske eigedommar. Dette arbeidet er heilt i samsvar med regjeringa sitt ønske. Per i dag er om lag 1650 eigedommar registrerte i prosjektet som blir kalla «Statens kulturhistoriske eigedommar». 400 av Statsbygg sine eigne bygningar er førebels vurderte som verneverdige eigedommar, og blant desse skal det igjen vurderast kva for bygningar som skal inngå i statlege sektorvise landsverneplanar. Desse planane skal gje grunnlag for freding og innehalde ei oversikt over eigedommane sektoren skal verne på andre vis. Det blir no satsa mykje på å verne dei kulturhistoriske eigedommane her i Noreg. Ved hjelp av kulturminnefagleg kompetanse får også Statsbygg ei viktig rolle i dette arbeidet, og vi medverkar dermed til å sikre verdfull historie.

Hege Njaa Rygh
Ansvarleg redaktør
henr@statsbygg.no