Mosaikk

Oslo tinghus fornya innvendig

Grunna stort behov for fleire rettssalar og meklingsrom har Statsbygg fornya Oslo tinghus på innsida. Statsbygg har etablert ti nye rettssalar, tolv nye meklingsrom, fleire møterom og tryggleikssluser. I tillegg er kontorløysingar endra, og det er installert nytt ventilasjonsaggregat. Totalt er 6000 kvadratmeter bygde om.
I ombygginga er det brukt dei same materialane og standardane som tidlegare, og det er ikkje gjort endringar på fasadane. Ombyggingsarbeidet har gått føre seg jamsides med den daglege verksemda i 47 rettssalar i heile ombyggingsperioden.

I fyr og flamme

Noregs brannskole har fått nye administrasjons- og aktivitetsbygg. Bygningane vart overleverte frå Statsbygg til Noregs brannskole 18. januar i år, og rommar mellom anna styrketreningsrom og gymsal.
Skolen er ein av fleire utdanningsinstitusjonar som Statsbygg forvaltar, og er den einaste i Noreg som tilbyr utdanning for kommunale brann- og feiarvesen og for brann- og redningspersonell ved lufthamnene. Skolen har eit bygningsareal på over 13 000 kvadratmeter, og er truleg den einaste skolen i landet som kan skryte av å ha fullt utrusta brannstasjon og kommandosentral som del av undervisingslokala. Samstundes med overleveringa av bygget blei det òg markert at skolen endeleg kan ta i bruk eit øvingsfelt for sløkking av flybrannar.

Statsbygg-prosjekt rimelegare enn budsjettert

Jamført med budsjettet har Statsbygg hatt ei innsparing på heile 227 millionar kroner på dei største byggjeprosjekta dei siste seks åra. Den samla sluttkostnaden for prosjekta var på snaue 8,4 milliardar kroner.
Det kjem fram av ein gjennomgang av store Statsbygg-prosjekt i perioden 2001–2006. Heile 67 av 75 bygg var ferdigstilte innanfor den såkalla styringsramma, og følgjeleg til lågare kost enn budsjettert.
Tala frå 2006 går inn i rekkja av gode resultat Statsbygg har levert dei seinare åra. Av åtte avslutta prosjekt er det berre eitt som har gått ut over styringsramma, og den totale innsparinga for 2006 var på 57,5 millionar kroner.

Ei auka kostnadsramme er ingen sprekk

Dei fleste prosjekta til Statsbygg er store prosjekt som går over mange år. Når prosjekta blir fremja for Stortinget, er det pengeverdien på vedtakstidspunktet som gir kostnadsramma. Sidan prisane utviklar seg, vil det fylgjeleg koste meir i nominelle kroner å byggje det same huset tre år seinare.
Statistisk sentralbyrå, som kalkulerer prisutviklinga innafor ulike bransjar, viser at prisane i byggjebransjen har stige vesentleg dei siste åra. Dei fleste byggjeprosjekta får derfor dei økonomiske rammene regulerte med SBED-indeksen, som bereknar prisutviklinga i byggjebransjen. Det sikrar at vi får like mykje materialar og arbeidskraft for den nye kostnadsramma som for den opphavlege. Stortinget føreset indeksregulering når økonomiske rammer skal fastsetjast.

Mai Anh Thi Lê nyutnemnd doktor

Mai Anh Thi Lê i Statsbygg blei nyutnemnd Ph.D. etter å ha forsvart doktoravhandlinga si ved Universitetet for miljø- og biovitskap på Ås like før jul. Ho disputerte for erfaring som eit kvalitetsfremjande middel i BAE-næring, med hovudvekt på erfaringsoverføring frå drifts- og vedlikehaldsfasar til prosjektfasar. Forskingsarbeidet tek mellom anna føre seg kva for tiltak og metodar som kan fremje læring i organisasjonen, for å avdekkje om eigedommane kan forvaltast meir effektivt ved å tilbakeføre erfaring.
Mai Anh Thi Lê er 31 år og utdanna sivilingeniør frå NTNU i Trondheim. Ho er busett i Oslo, har arbeidd i Statsbygg sidan 2002 og skiltar no også med doktorgradtittel. Mai Anh Thi Lê fekk stipend frå Statsbygg for å gjennomføre doktorgradsarbeidet.