Visste du det: Ny satsing på kultur og næring

Statsbygg har fått ei ny avdeling frå i år. Utviklingsavdelinga erstattar den tidlegare Plan- og utgreiingsavdelinga. Den nye avdelinga skal satse på kultur og næring i tillegg til miljø, stadutvikling og innovative brukarløysingar. Utviklingsavdelinga skal også arbeide med forskings- og samfunnsutvikling og trendanalysar innanfor byggje- og eigedomsnæringa og koordinere kunde- og marknadsarbeidet i Statsbygg.

Kultur og næring
Statsbygg er både interessert i og forplikta til å medverke til å skape ny verksemd med utgangspunkt i kultur og kulturminne.
- Vi eig mange kulturhistoriske eigedommar og det ligg i samfunnsoppgåva vår å arbeide for at desse blir ivaretekne og nytta på eit vis som gir grunnlag for verdiskaping, seier May Balkøy, direktør for Utviklingsavdelinga.
- Vi følgjer opp Stortingsmelding nr. 16, Leve med kulturminner og nr. 22, Kultur og næring. Derfor har vi oppretta ein ny seksjon kalla Kultur og næring. Vi ønskjer å utvikle metodikk og samarbeidsformer som medverkar til å utvikle dei kulturhistoriske eigedommane, og vi ønskjer å gi verdiskaping for staten, brukarane og lokalsamfunnet der eigedommane er lokaliserte. I fjor starta vi med utviklingsarbeid på Åker gard på Hamar og på Dømmesmoen i Grimstad. Føremålet er å kartleggje og synleggjere potensialet desse eigedommane har. Vi skal finne ei framtidsretta handsaming av eigedommane og etablere samarbeid med kommande brukarar, seier Balkøy.

Kryss.no
May Balkøy er initiativtakar til Kryss, som er namnet på ei rettleiing i kulturplanlegging og ein nettstad med same namn.
Føremålet med rettleiinga er å gi norske kommunar råd om korleis dei kan nytte kultur og kulturminne som grunnlag for stadutvikling. Kryss.no er ein nettstad for erfaringsutveksling innan kulturplanlegging.
- Vi har oppretta eit redaksjonsråd med medlemmer frå ulike departement, statlege etatar og kommunar. Nettstaden formidlar fortløpande nyheiter, metodikk og erfaringsmateriale frå denne typen planlegging i Noreg og i utlandet.

Urtehagen på Dømmesmoen i Grimstad