Nokre nøkkeltal

I 2015 vart det kjøpt eigedomar for 182 millionar kroner
og selt eigedomar for 482 millionar kroner med ein salsgevinst på 176 millionar kroner.
Eigedomsporteføljen vart vedlikehalden for 688 millionar kroner.
Rekneskapen viser vidare at aktivasida i balansen er på 39,8 milliardar kroner, og at
Statsbygg hadde driftsinntekter på 4,3 milliardar kroner i fjor.
Av dette kom 4,1 milliardar kroner frå husleigeinntekter.
Driftsresultatet vart på 1,8 milliardar kroner.
Talet på tilsette er 910
66 % er menn og 34 % er kvinner
446 av desse er tilknytt hovudkontoret i Oslo og
462 tilknytt regionkontora i Bergen, Tromsø, Trondheim, Porsgrunn og Oslo.
Sjukefråværet i 2015 var på 5,2 prosent og
turnover var på 6,4 prosent.

Oppstart og ferdigstilling av bygg

I 2015 gjekk det føre seg 117 byggeprosjekt i prosjekterings- og byggefase. Blant desse er store prosjekt som Nasjonalmuseet på Vestbanen, Campus Ås ved Noregs Miljø- og biovitskaplege universitet (NMBU), Regjeringskvartalet og Livsvitskapsbygget ved Universitetet i Oslo.

2015 bydde i tillegg på oppstart av 25 nye byggeprosjekt, og dessutan 20 ferdigstilte bygg. Prosjekt som vart ferdigstilt er blant anna Politihuset i Tromsø, Senter for husdyrforsøk ved NMBU og nybygget til Politiet og Statens vegvesen på Stord.

Statsbyggs mest miljøvenlege bygg

Bygget som skal huse Politiet og Statens vegvesen på Stord er eit såkalla plusshus, og er Statsbyggs til no mest energieffektive. Det har eit energibehov for levert energi på 34 kWh per kvadratmeter for bygget totalt, noko som er ein tredjedel av det som er normalt for gode, nye kontorbygg. Behovet for romoppvarming på huset er berre 4,1 kWh per kvadratmeter i året. For heile bygget tilsvarer det varmen frå to vanlege panelomnar.

Kva gjer Statsbygg?

Statsbygg har tre kjernefunksjonar: eigedomsforvaltning, byggherre og rådgiving og utvikling. Statsbygg si eigedomsforvaltning omfattar forvaltning, drift og verdibevarande vedlikehald av bygg og eigedomar som inngår i den statlege husleigeordninga.

Som byggherre i statleg sivil sektor, organiserer, planlegg og gjennomfører Statsbygg byggeprosjekt. Statsbygg er rådgivar for statlege verksemder i spørsmål om lokalbruk, lokalisering, planlegging, bygging, utvikling og forvaltning av miljøriktige og universelt utforma bygg og uteareal. Statsbygg gir råd ved inngåing av leigeavtalar i marknaden, og sikrar og koordinerer statlege interesser i større eigedomsutviklingsprosjekt.