Aldri før har Statsbygg opna så mange dører for publikum på éi helg. Frå kongebustader og kulturbygg til fengsel og tinghus, frå våre mest energieffektive bygg og til våre eigne kontorlokale – Statsbygg ønskte 11 200 publikummarar velkomne inn til 40 bygg over heile landet. Arrangementet var eit ledd i feiringa av to hundre år som statens forvaltar og byggherre.

– Å kunne invitere folk inn i nokre av dei aller finaste bygningane våre har vore ein veldig hyggeleg måte å feire bursdag på, seier kommunikasjonsdirektør Hege Njaa Aschim i Statsbygg.

I tillegg til store, kjende bygg som operahuset og Høgblokka i Regjeringskvartalet, opna også Noregs minste politistasjon dørene. Heile 80 personar trassa «Noregs dårlegaste veg» og tok turen til stasjonen, som ligg i Pasvikdalen i Finnmark.

– Vi har hatt ei veldig hyggeleg helg, med både vaksne og barn på besøk. I løpet av dei tre timane vi hadde ope, kom det heile åtti personar innom, noko som er ganske fantastisk med tanke på kor kronglete det er å kome seg hit, seier Hans Kåre Karlsen, som er Statsbygg sin driftsleiar og (og for høvet vaffelsteikar) på Nyrud.

850 på Stiftsgården

Ikkje uventa var Stiftsgården, den kongelege residensen i Trondheim, blant våre mest populære attraksjonar, med heile 850 besøkande. I trønderhovudstaden kom i tillegg 2300 menneske på besøk til Munkholmen, Kriminalasylet, Tronka og NTNUs byggeplass i sentrum.

Også i Bergen fekk publikum besøke kongefamilien sin bustad, Gamlehaugen. I tillegg var det omvisingar på både Tinghuset, Statsarkivet og den nye høgskolen på Kronstad. Vestlandet var ellers breitt dekt med opne hus frå Stavanger i sør til Balestrand i nord.

Botsfengselet i Oslo tilbydde omvisingar bak murane, og det økologiske lågsikkerheitsfengselet Bastøy utanfor Horten viste rundt på øya. Begge fengsla var godt fornøgde med besøkstal på til saman 1150, trass sikkerheitskrav som førehandsregistrering og mobil- og fotoforbod.

Opne hus

Som medarrangør av Oslo Åpne Hus har Statsbygg sidan 2008 opna utvalde bygg i hovudstaden. Det er likevel første gong heile landet blir inkluderte i eit slikt arrangement på éi og same helg