Nybygget ved handelshøgskolen er på 13.000 kvadratmeter, og prosjektet hadde ein sluttkostnad på 413 millionar. Den samla sluttkostnaden for alle dei byggeprosjekta er 1,3 milliardar kroner, viser Statsbygg si årsmelding for 2013. Her beskriv vi alle nybygg, rehabiliteringar og ombyggingar der sluttkostnaden er meir enn 3 millionar kroner.

Rehabiliteringa av Slottsplassen fekk ekstra merksemd i 2013. Statsråd Jan Tore Sanner kalla resultatet «sterk, offentleg gjennomføringsevne». Sluttkostnaden for rehabiliteringa er på 87,5 mill kroner.

– Vi gjennomfører nær sagt alle våre byggeprosjekt innanfor avtalte tids- og kostnadsrammer, seier administrerande direktør i Statsbygg, Harald Nikolaisen.

– Dette gjeld også for verksemdsåret 2013. Det vart ferdigstilt 22 større byggeprosjekt frå vår side, og alle vart gjennomførte i tråd med godkjende økonomiske rammer. Vi opplever at vi har eit solid omdømme i bransjen, hos kundane våre og hos oppdragsgivarane våre. At vi får stadig nye og store oppdrag er eit uttrykk for tillit, seier Harald Nikolaisen.

Pågåande prosjekt

Statsbygg har heile tida om lag 100 pågåande byggeprosjekt. I tillegg kjem cirka 60 mindre ombyggings- og brukartilpassingsprosjekt. Prosjekta er i forskjellige fasar og av ulik storleik. Ved utgangen av 2013 var 37 prosjekt i detalj- eller byggefasen.

Det er store prosjekt som er i støypeskeia eller som er under oppføring i regi av Statsbygg. Nasjonalmuseet på Vestbanen i Oslo, Kunst- og designhøgskolen i Bergen, Nybygget ved Noregs miljø- og biovitskaplege universitet på Ås, rehabiliteringa av sentrumsbygningane ved Universitetet i Oslo og nybygget ved Høgskolen i Bergen er fem eksempel på dette. Samla har dei ei kostnadsramme på 15,2 milliardar kroner.

– Dette er spennande og morosame utfordringar for oss i Statsbygg og for leverandørane våre. Vi er stolte over å ha byggherreansvaret for slike store og komplekse prestisjeprosjekt. Samtidig skal vi også vareta kundane våre som ikke har behov for store nasjonale signalbygg, men der vi kan tilby funksjonelle, energieffektive bygg med godt vedlikehald og standard tilpassa budsjett og behov, seier administrerande direktør Harald Nikolaisen i Statsbygg.