– Statsbygg rår over ufattelege 2 800 000 kvadratmeter med bygg, og det er få som bygger og tar vare på meir eigedom enn oss, seier administrerande direktør Harald Vaagaasar Nikolaisen. – I jubileumsåret ønsker vi å vise fram eit lite knippe av dei mange og flotte eigedomane som vi forvaltar.

Spreidd utval

Statsbygg byr ikkje berre på bygningar som er spreidde over det ganske land, det er også stor variasjon i typen bygningar som publikum kan besøke. Det blir omvising på kongebustadene Stiftsgården i Trondheim og Gamlehaugen i Bergen, Tromsø tinghus, Bergen tinghus, og Høgsteretts hus opnar også dørene, og på Kårvika havbruksstasjon utanfor Tromsø kan ein blant anna sjå svømmetunell for fisk. I dei energieffektive bygningane til politiet på Stord og høgskolen på campus Evenstad får ein vite korleis bygge miljøvenleg. Og få bygningar er meir spesialtilpassa for sitt bruk enn Justervesenet på Kjeller.

To fengsel

Det blir også mogleg å kome innanfor murane på Oslo fengsel (Botsen) og Bastøy fengsel. Begge er representantar for avstraffingsmetodar som for lengst har gått ut på dato. Botsen var bygd som eit panoptikon, der fangevaktaren sat midt i sentralhallen og kunne overvake alle cellene som var spreidde ut som ei vifte. Bastøy var opphavleg ein oppsedingsanstalt for forsømte gutar, berykta for sin strenge praksis, men er i dag eit humanøkologisk lågsikkerheitsfengsel.

Regjeringskvartalet

I Regjeringskvartalet blir det omvising i Høgblokka. I tillegg blir det fri vandring i R4 og høve til å sjå Picasso sin kunst inne i vestibylen i Y-blokka. I Oslo fell Statsbyggs opne hus saman med Oslo Åpne Hus, som totalt har 125 hus og hageanlegg på programmet.

Velkomen inn!