Dei danske arkitektane vann tidlegare i år arkitektkonkurransen for museet med bidraget «Naust». Oppdraget omfattar rehabilitering av eksisterande Vikingskipshus og inntil 9300 kvadratmeter nybygg. Med på designteamet til AART architects er også dei danske landskapsarkitektane SLA og kulturminnerådgivar Jens Treider. Arkitektane har tidlegare etablert eit Noregs-kontor, og vil dermed jobbe tett på prosjektet gjennom heile prosessen.

– Utan sidestykke

– samlinga Noreg har av gjenstandar frå vikingtida er utan sidestykke og er ei unik kjelde til kunnskap. Denne samlinga er ein viktig del av verdas kulturarv, seier Synnøve Lyssand Sandberg, byggherredirektør i Statsbygg.

Visjonen for det nye vikingtidsmuseet er å skape eit globalt leiande senter for formidling av kunnskap om vikingtida, og sikre komande generasjonar kunnskap om og forståing av vikingtida.

Konkurranse

12. april vart vinnarane i den opne plan- og designkonkurransen om nytt Vikingtidsmuseum kåra på ein pressekonferanse i Vikingskipshuset. Deretter har Statsbygg gjennomført forhandlingar med dei tre vinnarane, som kom på høvesvis 1., 2., og 3. plass. Kontrakten gjekk til teamet bak prosjektet NAUST, som også fagjuryen hadde kåra som nummer éin.

– Dette bidraget gir ei svært god løysing på ei komplisert oppgåve, seier Sandberg. AART har med konseptet sitt vist ei god forståing for oppgåva. Bygget har god funksjonalitet for publikum. Dei som ønsker eit kort besøk, vil kunne få god oversikt og oppleving av skipa og samlinga. Samtidig gir konseptet gode utsikter for fordjuping og utforsking.

Fagjuryen sine vurderingar, konklusjonar og tilrådingar er nedfelt i juryen sin rapport. Rapporten inneheld også ein generell omtale av dei overordna og samla erfaringane frå plan- og designkonkurransen. Statsbygg har tidlegare inngått kontrakt med Hjellnes Consult for tekniske rådgivarfag og med Brekke & Strand for eit eige sikringsprosjekt for vikingtidssamlinga.