GTIN er ein global unik identifikasjonsnøkkel som eintydig identifiserer eit produkt eller ei handelsvare. GTIN inngår for eksempel i strekkoden som ein skannar i kassen i butikkane. Føremålet for BAE-næringa er å kunne bruke GTIN for oppslag mot interne eller eksterne produktdatabasar for å få enkel tilgang til korrekt dokumentasjon av dei enkelte produkta som inngår i bygget.

– Statsbygg har i samarbeid med GS1 Norge, Bane NOR, Construction City, Helse Sør-Aust og Sykehusbygg utvikla ein rettleiar om GTIN for byggenæringa, fortel Anett Andreassen, som er direktør for digitalisering og utvikling i Statsbygg.

Den nye rettleiaren kan lastast ned frå GS1 sine nettsider.

– Bakgrunnen er at myndigheitene og bransjen stadig stiller større krav til dokumentasjon om produkt som inngår i byggeprosjekt. Informasjonen skal vere detaljert og korrekt, og vere tilgjengeleg i heile livssyklusen for bygget, frå prosjektering til riving til gjenbruk, seier Andreassen.

Global standard

GTIN er valt som identifikator fordi det er ein global standard som sikrar ein unik identifikasjon av alle produkt uavhengig av opphav, og som kan brukast av alle partar i verdikjeda på tvers av funksjonar og system.

Rettleiaren set søkelys på korleis GTIN kan lagast for nokre utvalde produktgrupper, og når i prosessane dette kan gjerast. Bruken av GTIN og når dette kan takast ut, vil variere med ulike produktgrupper. Vidare beskriv rettleiaren korleis GTIN kan brukast i dokumentasjon om produkta fram mot overlevering av bygget.

Denne første versjonen av rettleiaren beskriv fire hovudkategoriar av produkt: Standard hyllevareprodukt, ferdigbetong, betongelement og dører og vindauge. Produktgruppene er valde fordi dei representerer ulike situasjonar og utfordringar når det gjeld bruk av GTIN. Prinsippa for bruken av GTIN for dei utvalde produktgruppene kan overførast til mange andre produktgrupper.