Sidan 1925 har Gamlehaugen vore Hans Majestet Kongens offisielle residens i Bergen. Om sommaren er romma i førsteetasjen opne for publikum.

Etter eit storarta 100-årsjubileum i fjor, er det i år ei rekke nye spennande arrangement.

🎟️ Du kan lese heile programmet og kjøpe billettar på vår Gamlehaugen-side (under Program sommaren 2026), men her er ei kort oppsummering:

1. juni – 5. juni

Sesongen opnar med eit samarbeid med Festspillene i Bergen der unge musikarar spelar konsertar på Gamlehaugen. Konsertane er per nå utselt, men det er mogleg å sette seg på venteliste

7. juni

Unionsoppløysingsdagen blir feira med eit foredrag av direktør Iver B. Neumann ved Fridtjof Nansens Institutt og konsert ved Rune Alver. Etter arrangementet blir det servering av kaffi, saft og bollar, og eit musikalsk innslag ved studinekoret Sirenene på terrassen.

9. juni – 6. september

Omvisingar på norsk og engelsk i museumsdelen i førsteetasjen. Alle dagar unntatt måndag.

10. juni – 28. juni

«Den unge Michelsen. På veg mot makt» ved Det Vestnorske Teatret. Ei heilt ny framsyning skrive og dramatisert av teatersjef Thomas Bye tek publikum tilbake til starten av historia om Christian Michelsen, ein av dei mest sentrale politikarane i Noreg og mannen som i si tid bygde Gamlehaugen.

6. – 30. august

Det Vestnorske Teateret vender tilbake til Gamlehaugen etter fjorårets suksess med krimkomedien «Mordet på Michelsen». Framsyninga er basert på boka av Gunnar Staalesen og dramatisert av teatersjef Thomas Bye.