Statsbygg har fått i oppdrag av Kulturdepartementet å stå for prosjekteringa og bygginga av det nye reiselivsmuseet i Balestrand i Sogn og Fjordane. Bygget skal i hovudsak romme utstillingsareal, auditorium, magasin, kontor, kafé og resepsjon.

Byggherredirektør Hilde Nordskogen frå Statsbygg deltek i grunnsteinsseremonien saman med kommunal- og regionalminister Liv Signe Navarsete og direktør Anne-Marie Førde frå Musea i Sogn og Fjordane.

Inn i fjellet

– Bygget blir spennande. Det skal ligge ved sida av Kviknes Hotel og er teikna av Askim/Lantto Arkitekter. Totalt blir det på cirka 1800 kvadratmeter, seier prosjektleiar i Statsbygg Nils Øyvind Bø.

– Arkitekturen er spesiell. Bygget blir nærast skore inn i fjellet, og tanken er å skape ei tilknyting til norsk natur. Og natur er jo eit viktig element i norsk reiseliv, forklarer Bø. Arbeida er no komne så langt at vi kan sjå konturane av bygget slik det skal utformast mellom fjellvegger og pilarar av fjell. Dei heilt spesielle fjellarbeida, som har vore svært krevjande, vil vere ferdige om få veker.

Statsbygg er byggherre for prosjektet, og generalentreprenør er Åsen & Øvrelid AS i Førde.

– Det vil bli spennande å jobbe vidare med eit unikt prosjekt og unikt bygg.

KORO held møte for kunstkomiteen

For alle offentlege byggjeprosjekt blir det løyvd pengar til kunst for bygget. Dette er administrert av KORO, «Kunst i Offentlige Rom», www.koro.no. Ein kunstkomité er nedsett av KORO beståande av ein representant kvar frå KORO, Norsk reiselivsmuseum, Statsbygg og Askim/Lantto Arkitekter. Kunstkomiteen blir leia av kunstkonsulent Ole John Aandal. Ein open konkurranse vart lyst ut for å engasjere ein kunstnar. Vinnaren av konkurransen vart kunstnaren Børre Sæthre, som har base i New York. Kunstnaren vil på synfaring på byggeplassen for å danne seg eit best mogleg inntrykk av fjellet og korleis bygget blir utforma.