I oktober la Statsbygg og Trøndelag fylkeskommune ein av dei aller mest spennande eigedommane for byutvikling i Trondheim ut for sal. Områdeplanen legg opp til at det kan byggast ca. 1700 bustader på Brøset.

Det har vore god interesse for eigedommen. Ei kjøpargruppe beståande av Fredensborg Bolig, Heimdal Bolig, Trym Bolig og Byggteknikk Prosjekt gjekk sigrande ut av bodrunden. Kjøpesummen er konfidensiell fram til endeleg avtale er inngått.

I tillegg har Statsbygg og fylkeskommunen inngått avtale med Trondheim kommune om direktesal av areal sett av til blant anna skule og barnehage, til ein kjøpesum på 93,5 millionar.

– Den samla salssummen er i tråd med forventningane våre, og vi er godt nøgde med prosessen så langt. No ser vi fram til eit godt samarbeid vidare med kjøpargruppa og kommunen, seier kommunikasjonsdirektør Hege Njaa Aschim i Statsbygg.

Framover skal det avklarast nødvendige atterhald før Statsbygg og fylkeskommunen blir einige med kjøpargruppa om salskontrakt. Salet skal styrebehandlast av aktørane i kjøpargruppa. Statsbygg og Trøndelag fylkeskommune tar sikte på å underteikne kontrakt med kjøpargruppa i slutten av februar.

Salet sikrar sjukehus

Brøset ligg fire kilometer aust for Trondheim sentrum. Totalt er tomtearealet på ca. 340.000 kvm.

I samsvar med områdeplanen skal Brøset utviklast til å bli ein framtidsretta miljøbydel. Målet er å skape ein bydel som er klimanøytral, og samtidig eit bumiljø som er godt og attraktivt å leve i.

Eigedomssalet sikrar også finansieringa av eit nytt bygg for St. Olavs hospital si psykiatriske avdeling, som i dag ligg på Brøset. Det nye psykiatribygget skal byggast i Østmarka. 275 millionar kroner av salsinntektene vil gå til det nye psykiatribygget.