Dei seks konsulentteama som vart innstilt som vinnarar i den opne anbodskonkurransen om parallelloppdraget for det nye regjeringskvartalet, underteikna torsdag kontrakten med Statsbygg.

Snøhetta, White, BIG, Asplan Viak, MVRDV og LPO/Arkitekt Kristine Jensens tegnestue/Norconsult utgjer dei seks konsulentgruppene.

Idéar

– Oppgåva deira er å kome med idéar om korleis Regjeringskvartalet kan utformast. Ikkje korleis bygningane skal sjå ut, men meir kvar dei skal stå, kor høge dei bør verre, korleis trafikk, miljø og sikkerheit skal integrerast, korleis byrommet skal vere og kva slags byplangrep som må takast, seier strategi- og utviklingsdirektør Bjørne Grimsrud i Statsbygg.

– Vi har fått spennande samarbeidspartnarar i dei seks teama, og dei igjen har fått ei real utfordring. Dette er jo Noregs mest spennande byplanleggingsoppgåve, seier Bjørne Grimsrud.

Levande byrom

– Regjeringa ønsker eit regjeringskvartal med levande byrom og gode arbeidsplassar, seier kommunal- og moderniseringsminister Jan Tore Sanner.

– I idéfasen vil vi ta mot innspel på korleis byromma kan formast, kvar dei nye bygga kan stå og kvar gateløpa kan leggast. Innspela blir viktige for det vidare arbeidet og vil gi eit godt grunnlag for diskusjon om utvikling av denne delen av byen, seier Sanner.

Premissar

Sjølve programmet for parallelloppdraget er no klart og offentlegjort. Teama vil bli delte inn i to grupper som får same oppgåveformuleringar, men med noko ulike premissar. Det er tre hovudoppgåver. Tre av teama gjer oppgåve A og C, mens dei tre andre teama gjer oppgåve B og C.

Teama skal vise ei etappevis utbygging av regjeringskvartalet og skal illustrere to komplette stadium i utviklinga – eitt for status 2024–2034 og eitt for 2064.

Oppgåve A – «Kompakt»: Vise ei utbygging innanfor studieområdet sør for Ring 1 og Hospitalsgata i 2024 – med gitte premissar. For heile planområdet i 2064.

Oppgåve B – «Konsentrert»: Vise ei utbygging innanfor studieområdet avgrensa av Ring 1 i nord fram til 2034 – med gitte premissar. For heile planområdet i 2064.

Oppgåve C – «Visjon»: Vise ei utbygging for heile studieområdet som baserer seg på korleis teama sjølv tolkar vedtaket frå regjeringa.

– I oppgåve «visjon» er det høve til å avvike frå premissane som er gitt under dei to andre oppgåvene. Likevel må overordna mål og føringar i vedtaket frå regjeringa haldast ved lag. Det fine med ei slik fordeling er at alle teama leverer to forskjellige oppgåver. Ei der de står meir fritt og ei der dei må følge visse føresetnader, seier Bjørne Grimsrud

Tidsplan

Oppstartsseminar: 7. og 8. januar 2015
Innlevering av parallelloppdrag: 25. mars 2015
Utstillingsperiode: opning 13. april 2015, varigheit ca. 4 veker
Evaluering: blir avslutta 8. mai 2015

Statsbygg har inngått ein samarbeidsavtale med Arkitektur- og designhøgskolen i Oslo. Med dei same oppgåverammene og fristane skal eit studentkurs utarbeide eit eige planforslag for det nye regjeringskvartalet. Intensjonen er at arbeidet studentane gjer, skal bringast inn i planarbeidet og komande diskusjon om byplangrep og byplanprinsipp.

Les programmet her.