Anbefalinga bygger på gode idear frå parallelloppdraga, drøftingar i rapporten frå evalueringskomiteen og andre innspel. Dette skal no behandlast av departement og politikarar før forslag til reguleringsplan blir lagt fram våren 2016.

Her er dei viktigaste grepa Statsbygg gjer i anbefalinga si:

Hovudvekt av bygningar mellom Møllergata og Grubbegata.
Konsentrert bygningsmasse med variert volumoppbygging og med moderate høgder, 24–48 m. Høgblokka (56 m) er høgaste bygning.
Eit byggeområde blir etablert (felt A) mellom H-blokka og Deichmanske bibliotek.
Det blir lagt til grunn 23 m² BTA per tilsett. Dette er lågare enn dei 25 m² BTA som vart brukt i parallelloppdraga, men innanfor vedtaket i regjeringa.
Etablering av park i nord-austleg del av området som opnar opp for betre eksponering av kulturminne som Trefoldighetskirken og Deichmanske bibliotek.
Hovudtilkomst frå Akersgata som understrekar det viktige sambandet mellom Regjeringskvartalet og Stortinget.
Spreidde inngangar langs Grubbegata.
Heile området blir ope for fotgjengarar og syklistar.
Det blir oppretta ei utvida sikringssone, Ring 1 blir senka og alle rampene som knyter Ring 1 til det omkringliggande gatenettet blir fjerna.
Akersgata blir stengt for allmenn biltrafikk, men nytta som open kollektivtrasé.
Møllergata blir stengt for allmenn biltrafikk, berre for kontrollert varelevering som eit ledd i «grøn varedistribusjon» i Oslo sentrum.
– Utbygging av felt A medverkar til at det er mogleg å etablere heile det nye regjeringskvartalet sør for Ring 1, med moderate høgder. På den måten vil kvartalet tilpasse seg den omkringliggande bygningsmassen. A-blokka vil kunne gi rom for bylivsaktivitetar mot Regjeringsparken, og det er i tillegg føreslått ein paviljong for publikumsretta aktivitetar i parken, fortel administrerande direktør Harald Nikolaisen i Statsbygg.

– Hovudkonklusjonen til Statsbygg er at det er fullt mogleg å etablere eit godt og effektiv regjeringskvartal, som samtidig kan gi mykje tilbake til Oslo by. Vi anbefaler derfor at det blir arbeidd vidare langs dei linjene som vi har trekt opp, seier Harald Nikolaisen