Adapt er teikna av Team Urbis, og Lysning av G8 +.

Jury

Sju prosjekteringsgrupper har deltatt i konkurransen, og i mai leverte dei sine løysingsforslag. Ein jury på ni medlemmer har vurdert konkurransebidraga og har no kåra to vinnarar.

– Vi er ved ein stor og viktig milepåle i prosjekt nytt regjeringskvartal. Dette er den store arkitektkonkurransen, og med dei to vinnarane juryen har kåra, får ein ein klar indikasjon på korleis regjeringskvartalet kan bli sjåande ut, seier administrerande direktør Harald Nikolaisen i Statsbygg.

Uttale

Statsbygg skal snarleg i forhandlingar med Team Urbis og G8+ om tildeling av prosjekteringskontrakt. Juryens rapport og rangering av vinnarane vil, av omsyn til forhandlingane, ikkje bli offentleggjort før kontrakt er tildelt. Juryen har likevel komme med ein uttale til avgjerda og seier blant anna:

– Kontorbygga langs Grubbegata og ved Einar Gerhardsens plass er i vinnarforslaga godt tilpassa omgivnadene. Bygga bidrar til eit variert og tilgjengeleg plass- og gaterom. Bygningsvoluma i vinnarprosjekta er nedskalerte mot Møllergata og Youngstorget. Grubbegata får i vinnarprosjekta ei ny og forbetra rolle i byveven.

Forhandlingar

Det er venta at tildeling av kontrakt skjer i oktober. Då veit ein om det er G8+ og Team Urbis som blir med vidare, og om det er Adapt eller Lysning som vil bli lagt til grunn i det vidare arbeidet med nytt regjeringskvartal.

– Eg vil takke juryen for arbeidet. No går vi inn i forhandlingar, og det er ei erkjenning at for ein byggherre er det meir enn sjølve løysingsforslaget som er viktig. Juryen sine vurderingar og rangering av løysingsforslaga vil likevel spele ei stor rolle i forhandlingane, seier Statsbygg-direktøren.

I forhandlingane legg ein vekt på «kvaliteten på løysingsforslaget» mest (50 %), men også «oppdragsforståing, medrekna kvaliteten på tilbydd personell» (35 %) og «honorar» (15 %) speler inn.

Juryarbeidet

Juryen har evaluert etter eit konkurranseprogram som bygger på den vedtatte reguleringsplanen og det fastsette rom- og funksjonsprogrammet. Juryen har vurdert om konkurransedeltakarane har utarbeidd eit arkitektonisk konsept og eit løysingsforslag der funksjonar er fordelte og organiserte på ein måte som skaper gode, fleksible og effektive rammer for departementsfellesskapet, samtidig som området er tilpassa byen omkring.

Juryen har vektlagt følgande tema i vurderinga si av løysingsforslaga: arkitektonisk utforming, kulturminne, økonomi, gjennomførbarheit, openheit, byliv, organisering av arbeidsplassar og fellesfunksjonar, fleksibilitet, miljø og sikkerheit.