Det nye anlegget på Tyholt vil bli svært viktig for verdiskapinga i havnæringane dei neste tiåra, og eit viktig bidrag til grøn omstilling. Ocean Space Centre har fått startløyving i forslaget til statsbudsjett for 2022. Byggeprosjektet er gitt ei styringsramme på 6,9 mrd. kroner.

31 selskap deltok då Statsbygg arrangerte leverandørmøte på Marinteknisk senter i Trondheim onsdag 1. desember. Fleire store entreprenørselskap deltok i møtet, som vart halde både fysisk og digitalt.

– Det er openbert svært stor interesse for dette prosjektet i leverandørmarknaden. Då er det svært nyttig med denne typen samlingar der vi får presentert det nye senteret og gitt ein grundig gjennomgang av kontrakts- og gjennomføringsstrategien vår, seier Statsbyggs prosjektleiar Simen Bakken.

Fleire store kontraktar

Det skal inngåast fleire store kontraktar for Ocean Space Centre våren 2022. Senteret består av flere fløyer, og kontraktane omfattar både riving og bygging.

Det skal inngåast ein kontrakt om totalentreprise for fløy A som består av kontor- og undervisningsbygg. Fløy A har forventa oppstart i 2022 og er venta ferdigstilt i 2024.

Det skal også inngåast kontrakt om ein totalentreprise for riving og grunnarbeid for bassenga, som utgjer fløy B. Det skal også inngåast ein samspelsentreprise for bygg og betong for den same fløya. Fløy B har forventa oppstart i 2022.

I tillegg skal det inngåast ein kontrakt om totalentreprise for studentlaboratoria, som utgjer fløy C. Fløy C har forventa oppstart i 2026 og planlagt ferdigstilling i 2028.

Ocean Space Centre skal etter planen erstatte det marintekniske forskingssenteret som ligg på Tyholt i dag, og i tillegg etablere seg på Trondheim biologiske stasjon i Heggdalen. Senteret vil omfatte både forskingsverksemda til SINTEF og undervisningsverksemda til NTNU innan forsking og marinteknikk.