På Tyholt i Trondheim skal Ocean Space Centre bli eit av dei mest avanserte anlegga i verda for forsking på og undervisning om hav. I forslaget til statsbudsjett fekk det 44.000 kvm store prosjektet nyleg ei oppstartsløyving på 500 millionar, som baserer seg på ei ramme på 6,9 milliardar kroner.

No lyser Statsbygg ut konkurransen for vidare prosjektering av senteret og rådgivning i byggprosjektet.

– Dette blir eit av landets mest spennande og avanserte byggeprosjekt dei neste åra. Vi treng dei beste løysingane for å legge til rette for forsking av høg kvalitet. No gler vi oss til å få dei fremste fagmiljøa med på laget som skal forme Ocean Space Centre, seier prosjektleiar Simen Bakken i Statsbygg.

Stor gruppe med mange fag

I tillegg til ingeniørar innan mekanikk/utstyrsrådgivarar skal prosjekteringsgruppa bestå av arkitektar og rådgivande ingeniørar innan ei rekke andre fag, blant anna bygg, geoteknikk, bygningsfysikk, energi og miljø.

Ocean Space Centre skal omfatte både forskingsverksemda til SINTEF og undervisning- og forskingsverksemda til NTNU innan marinteknikk. I anlegget inngår blant anna laboratorium med høyspesialisert utstyr, som fleire store basseng, der ein kan teste og forske på modellar av for eksempel plattformer eller båtar. Det er også planlagt laboratorium der ein kan teste ulike typar motorar og konstruksjonar.

Det skal også byggast kontorbygg og undervisningslokale for SINTEF og NTNU. I tillegg til sjølve senteret er det planlagt infrastruktur og testmoglegheiter i havet, både rundt øyene Hitra og Frøya, og utanfor Ålesund.

Ocean Space Centre skal etter planen stå ferdig i 2028.