Tettare samarbeid med eigedomsbransjen via digitale verktøy er avgjerande når Statsbygg søkjer etter lokale i marknaden. Behovet for digital samhandling med tilbydarar er nødvendig når Statsbygg sine oppgåver veks i omfang og kompleksitet.

Statsbygg lanserer derfor no den digitale samhandlingsplattforma statensinnleie.no for tilbydarar av lokale i marknaden.

Det blir alt i dag utveksla store mengder informasjon mellom Statsbygg og utleigarar. Utvekslinga blir no digitalisert og forenkla. Statsbygg gjennomfører rundt 30 søk i marknaden pr. år og etterspør opptil 100.000 kvadratmeter. Det er ikkje uvanleg at Statsbygg får mellom 20 og 30 indikative tilbod når det blir søkt etter lokale.

– For å lykkast med effektivisering av anskaffingsprosessane våre ved innleige av lokale, vil Statsbygg i endå større grad legge til rette for digitalisering og kvalitetsforbetringar, og vi gjer det gjerne saman med eigedomsbransjen. Vi ser ei veksande oppdragsmengd og ønskjer å ruste oss for framtida, seier Statsbyggs direktør for rådgiving og tidlegfase, Hege Maria Eriksson.

Fleire fordelar for tilbydarane

Samhandlingsplattforma vil gi eigedomsbransjen og tilbydarar av lokale i marknaden fleire fordelar.

Ved å gå inn på nettsida kan ein lett legge inn nøkkelinformasjon om leigeobjektet og gi eit indikativt tilbod utan å måtte ringje eller sende e-post til prosjektleiarar i Statsbygg. Nøkkelinformasjonsskjemaet er digitalisert.

I tillegg har plattforma sikkerheitsfunksjonalitet, som vil sikre at verksemdskritisk informasjon ved leigeobjektet blir varetatt på ein forsvarleg måte. Det er også mogleg å tilby same leigeobjekt til fleire søk.

Eigedomsbransjen vil framleis bli varsla frå Nemeet når Statsbygg søkjer etter lokale, og gå rett frå Nemeet til statensinnleie.no. Tilbydarar av lokale som ikkje abonnerer på Nemeet, kan gå direkte til portalen og finne aktuelle leigesøk der.

Du kan lese meir om leige i marknaden og rådgivningstenesta på Statsbyggs nettsider.