For informasjonssenteret, som ligg på hjørnet av Teatergata og Akersgata i Oslo, er det nye opningstider:

Onsdag-fredag kl. 12.00-16.00

– For grupper som skal på besøk, er det mogleg å komme utanom opningstida. Send ein e-post til regjeringskvartalet@statsbygg.no så er det mogleg å avtale, forteljar kommunikasjonsleiar for nytt regjeringskvartal, Pål Weiby:

– Eg oppfordrar spesielt skoleklassar til å komme innom, gjerne med avtale på førehand. Besøket kan kombinerast med andre sjåverdigheiter og opplevingar rett i nærleiken av informasjonssenteret, fortel Weiby.

Det mellombelse 22. juli-senteret held til litt lenger nede i Teatergata. Ved Lindealléen føre Høgblokka mot Akersgata ligg den mellombelse minnestaden etter 22. juli-hendingane kor hovudelementet er namneveggen med namn og alder på dei som blei drepne i terrorudåden.

I Akersgata kan ein sjå dei store trekassene, som rommar kunstverka «Fiskarane» og «Måken» av Picasso. Verka, som er store betongtavler, var tidlegare intrigert i den rivne Y-blokka, og skal etter kvart få ny plass i den nye A-blokka. Sjølve byggegjerdet rundt byggeplassen er òg utanom det vanlege. Det blir pryda av fire kunstverk, blant anna eitt som er 120 meter langt. Formspråket varier frå gatekunst til klassisk målekunst.

– Sjølve senteret byr på vellaga, korte filmar og ei informativ utstilling som inkluderer fleire store illustrasjonar. Den flotte tremodellen over kvartalet og store delar av Oslo sentrum er sjåverdig, seier Weiby.

For tida er Statsbygg godt i gang med byggetrinn 1 som blant anna inneheld rehabilitering av Høgblokka og bygginga av kjellar, A-blokka og D-blokka.