Dermed er det duka for eit heilt nytt og endå meir innhaldsrikt Livsvitskapsbygg ved Forskingsparken i Oslo. Når det står ferdig, vil det samle forskarar i Klinikk for laboratoriemedisin (KLM) ved OUS i tillegg til forskingsmiljøa innanfor kjemi, farmasi og livsvitskap hos UiO, som opphavleg skulle halde til i bygget åleine.

Saman vil OUS og UiO dra nytte av kvarandre sin kompetanse, utstyr og fellesområde.

Det nye Livsvitskapsbygget vil no bli på totalt 97 000 kvadratmeter. Det er rundt 12 000 kvadratmeter større enn det var lagt opp til då berre UiO skulle halde til i bygget.

KLM vil disponere om lag 30 000 kvadratmeter og kan dermed samle diagnostikk og forsking mykje tidlegare enn først planlagt. Både OUS og UiO stiller svært høge krav til funksjonalitet og stabilitet i forhold til den verksemda som skal gå føre seg, og bygget vil bli eit av dei mest avanserte forskingsbygga i Noreg.

– Innflyttinga i heilt nye og framtidsretta bygg gir oss opning for tettare samarbeid på tvers av fagmiljøa innetter i klinikken – både innanfor diagnostikk og forsking. Dette vil både styrke konkurranseevna vår og bidra til eit betre tenestetilbod for pasientane våre, og det er sjølvsagt veldig gledeleg, seier klinikkleiar Andreas Matussek.

– Det har vore eit svært godt samarbeid mellom Statsbygg, OUS, HSØ og UiO i arbeidet som førte fram til denne viktige avgjerda. Vedtaket er ein milepåle i arbeidet med realisering av Livsvitskapsbygget og opnar heilt nye utsikter for framifrå livsvitskapsforsking og innovasjon, seier Per Morten Sandset, leiar av livsvitskapsprosjektet hos UiO.

Det nye Livsvitskapsbygget skal vere eit felles bygg for leiande universitets- og sjukehusmiljø innanfor livsvitskap og sikre Noreg internasjonal konkurransekraft på området. Her skal ulike fagmiljø jobbe tverrfagleg for å utvikle nye løysingar på store utfordringar innanfor helse og berekraft med tilgang til det beste og mest moderne utstyret som krevst for å drive forsking og innovasjon i verdsklasse.