Det er i samband med arrangementet Oslo Åpne Hus at to av dei skadde bygningane i Regjeringskvartalet blir opna opp for alle. Totalt blir over 100 bygg og eigedomar som normalt ikkje er tilgjengelege for publikum. opna. Dette er eigedomar i både privat og offentleg eige.

Påmelding

Høgblokka og R4 er opne frå 12.00 til 15.00 både laurdag og søndag. Oppmøtestad er Einar Gerhardsens plass. Det vil vere mogleg å gå fritt i store delar av R4 og 1. etasje på Høgblokka med kantine og resepsjonsområdet. I 2.-17. etasje i Høgblokka vil det vere ein guida tur med påmelding på staden.

– Av praktiske og sikkerheitsmessige årsaker er det avgrensa kor mange som kan kome inn i Høgblokka, men med grupper à 25 personar kvart 10 minutt skulle det likevel bli ganske mange som kan kome inn, seier kommunikasjonsrådgivar Pål Weiby i Statsbygg

– Det er viktig at alle tilvisingar for turen opp i Høgblokka blir følgde, og vi gjer merksam på at for somme kan turen vere fysisk og psykisk krevjande. Det er ingen heis i bygget, så ein må gå alle trappene til topps, påpeikar Weiby

Takterrasse

– Ein av dei mest interessante plassane er takterrassen i 7. etasje på R4. Dit kan alle kome, og det gir ei fin oversikt over heile Regjeringskvartalet, seier Weiby.

Høgblokka og R4 vart ferdig rydda og sanert for over eitt år sidan. Dei vart sanerte ned til eit nivå der ein enten kan fortsetje rivinga eller begynne oppbygginga igjen. Det er ikkje tatt ei avgjerd om kva skal skje med dei skadde bygningane i Regjeringskvartalet. I juni leverte ei konsulentgruppe ei konseptvalsutgreiing til regjeringa. Den er no til ekstern kvalitetssikring i regi av Finansdepartementet.

I dag er Høgblokka og R4 som tomme skal, men med eitt unntak; dei to øvste etasjane i Høgblokka, tilhøyrande Statsministerens kontor, er mykje mindre skadde enn dei andre etasjane.

Både Høgblokka og R4 står støtt. Det var ingen skadar av større omfang på berande element. Asbesten som var i Høgblokka etter bombeangrepet, er fjerna.