– Bystyrevedtaket er ein milepåle for oss. Dette er eit komplekst prosjekt, og vi ser fram til vidare samarbeid om Ocean Space Centre i Trondheim, seier prosjektleiar Simen Bakken i Statsbygg.

Dersom Stortinget vedtar bygginga av Ocean Space Centre, vil anlegget omfatte både forskingsverksemda til SINTEF og undervisning- og forskingsverksemda til NTNU innan marinteknikk.

I anlegget inngår det blant anna laboratorium med høyspesialisert utstyr, som fleire store basseng der ein kan teste og forske på modellar av for eksempel plattformer eller båtar. I tillegg er det planlagt laboratorium der ein kan teste ulike typar motorar og konstruksjonar. Det skal også byggast kontorbygg og undervisningslokale for SINTEF og NTNU.

I tillegg til sjølve senteret er det planlagt infrastruktur og testmoglegheiter i havet, både rundt øyene Hitra og Frøya, og utanfor Ålesund.

Statsbygg er byggherre for anlegget, og fekk i desember 2019 oppdraget med å utarbeide ein reguleringsplan. Første fase var å utforme eit forslag til planprogram som beskriv formål, rammer og premissar for planarbeidet, og opplegg for medverknad og behovet for utgreiingar.

Eit planforslag vart sendt på høyring og offentleg ettersyn tidleg i 2021. Basert på merknadene som kom inn, vart forslaget til reguleringsplan justert. Det er denne som no er vedtatt av bystyret.

– Vi takkar for alle innspela vi har fått i prosessen. Det har gjort dette til ein betre reguleringsplan, som legg gode rammer for det vidare arbeidet med Ocean Space Centre, seier Bakken.

Oppstart av eventuelt byggeprosjekt er avhengig av løyving på statsbudsjettet for 2022.