Den foreslåtte løyvinga er ein auke på rundt 40 prosent frå 2021.

– Det rekordhøge nivået på investeringar gjer at Statsbygg skal gjennomføre ei rekke viktige prosjekt over heile landet dei kommande åra. Det gler vi oss til, og det betyr nye spennande utfordringar som Statsbygg og den norske leverandørmarknaden må løyse saman, seier administrerande direktør Harald Nikolaisen i Statsbygg.

I statsbudsjettet blir det løyvt pengar både til vidareføring av pågåande byggeprosjekt og oppstart av nye. Dessutan blir det løyvt pengar til bygningar som blir forvalta av Statsbygg og inngår i statens husleigeordning, og til bygningar som blir bygde av Statsbygg, men forvalta av dei statlege brukarane sjølv og ikkje inngår i husleigeordninga.

Teater og skolar

Det er foreslått løyvt ca. 6,5 milliardar til ordinære byggeprosjekt innanfor husleigeordninga. Blant dei foreslåtte løyvingane er oppstart av Blått bygg ved Nord Universitets campus i Bodø med 110 millionar kroner, 22. juli-senteret i regjeringskvartalet med 92,3 millionar kroner, samlokalisering av det samiske nasjonalteateret Beaivváš og Samisk videregående skole og reindriftsskole i Kautokeino med 60 millionar kroner og oppstart av rehabiliteringa av Nationaltheatret i Oslo med 43 millionar kroner inkludert brukarutstyr.

Prosjekteringa av Bergen tinghus og samlokaliseringa av Havforskingsinstituttet og Fiskeridirektoratet i Bergen er foreslått vidareført med høvesvis 40 og 60 millionar kroner. I tillegg er det foreslått vidare prosjektering av nytt Oslo fengsel med 30 mill. kroner.

Nytt regjeringskvartal inkludert ny energiløysing er foreslått vidareført med ei løyving på 3,6 milliardar kroner. Fagskolen for brann og redning i Tjeldsund er foreslått vidareført med 280 millionar kroner, og rehabilitering av Ila fengsel med 195 millionar kroner. I tillegg er det foreslått løyvt 1,2 milliardar til ei rekke brukarfinansierte prosjekt.

Forskning og vikingskip

Det er foreslått løyvt ca. 2,3 milliardar til investeringar utanfor husleigeordninga. Det er blant anna foreslått at prosjekteringa av ny campus ved NTNU blir vidareført med 365 millionar kroner inkludert brukarutstyr. Det er foreslått oppstartsløyving til bygging av Ocean Space Centre på 500 millionar kroner inkludert brukarutstyr.

Vidare er det foreslått gitt ei løyving til vidareføring av Livsvitskapsbygget på 900 millionar kroner, Vikingtidsmuseet på 352, 5 millionar kroner og ei samla løyving til brukarutstyr på 228,6 millionar kroner.