Varsla gjaldt særleg brot på lønns- og arbeidsvilkår både hos bemanningsselskap og entreprenørar, også kombinert med mobbing og trakassering. I ei sak vart det avslørt omfattande og systematiske brot på lønns- og arbeidsvilkår hos underleverandørar.

Vil ha flere varsler

Ingen saker avslørte sosial dumping på Statsbygg sine byggeplassar. Statsbygg oppfordrar likevel både interne og eksterne aktørar til å varsle om kritikkverdige forhold. Byggebransjen sjølv har ved fleire høve gitt uttrykk for at det skjer for mange brot på regelverket og at kriminaliteten breier om seg.

– Generelt meiner eg at vi har for få varsel sett i forhold til storleiken på verksemda vår, seier administrerande direktør Harald Vaagaasar Nikolaisen i Statsbygg.

Tar vare på varslarar

Statsbygg oppfordrar både eigne tilsette og innleigd personell om å varsle om kritikkverdige forhold. Varslarar kan bidra til at vi unngår ulykker på byggeplassen, sosial dumping, kriminelle handlingar eller andre uønskte hendingar.

– Varslarane skal vite at vi er førebudde på å ta hand om dei og beskytte interessene deira, seier Harald Nikolaisen. Varsla blir behandla av Statsbygg sin varslingskomité, som består både av eigne tilsette og ein ekstern representant.

Samarbeid mot arbeidslivskriminalitet

Ei av sakene i fjor vart handtert i samarbeid med Senteret mot arbeidslivskriminalitet i Oslo & Akershus (A-krimsenteret) og Arbeidstilsynet. Varslaren fekk løpande rettleiing frå A-krimsenteret og Arbeidstilsynet. Statsbygg er svært nøgd med dette samarbeidet og ønsker å halde fram samarbeidet i kommande saker.

Statsbygg har utarbeidd ein eigen varslingsplakat som heng på hovudkontor, eigedommar og prosjektkontor i Statsbygg. Plakaten ligg føre på norsk, engelsk, polsk og russisk. Ein elektronisk varslingskanal er gjort tilgjengeleg på norsk, engelsk, litauisk, polsk og russisk.