Til det nye regjeringskvartalet jaktar Statsbygg nokon som kan utvikle flyttbare, akustiske innervegger der dei lydabsorberande elementa er ein integrert del av veggen.

Konkurransen vart lyst ut 14. september. Ved utløpet av søknadsfristen hadde Statsbygg fått tilbod frå 16 firma som ønskte å delta.

– Det er veldig gøy at konkurransen har blitt mottatt med så stor interesse i marknaden, men i samsvar med konkurranseprogrammet er det berre seks firma som blir inviterte til å vere med vidare i konkurransen, seier prosjektleiar Synnøve Haugen i Statsbygg.

Dei seks firmaa er:

Acusto AS (Oslo)
Alliance Arkitekturstudio AS (Oslo)
Bosvik AS (Risør)
Lindner Scandinavia AB (Västra Frölunda, Sverige)
Moelven AS (Moelv)
Termowood AS (Hurdal)

I evalueringa er det lagt vekt på om firmaa har tilstrekkeleg kompetanse for utvikling av ønskte løysingar ut frå innsende referanseprosjekt. Det er sett på om referanseprosjekta viser tema som flyttbarheit, gjenbruk og akustikk.

– Dei seks deltakarane får 200.000 kroner kvar for å utvikle eit løysingsforslag, som skal leverast innan 3. desember, fortel Haugen.

Fleksibilitet

Det nye regjeringskvartalet skal ha fleksible løysingar slik at rominndelingar kan endrast etter talet på tilsette, oppgåvefordeling og ulike arbeidsformer. For å få til dette jaktar Statsbygg modulbaserte veggsystem.

Målsettinga for idékonkurransen er å utvikle ein ny type flyttbare innervegger der lydabsorberande element blir ein integrert del av veggen, og ikkje noko som blir montert utanpå veggen.

– Innan jul skal vi ha kåra ein vinnar, og vinnaren får 300.000 kr for å utvikle ein prototype av veggmodulen, forklarer Haugen.

Tre i stortingsvedtak

Stortinget vedtok i 2018 at tre skal vere eit viktig element i det nye regjeringskvartalet, og at bygginga av regjeringskvartalet skal legge til rette for å bidra til innovasjon og utvikling hos norske leverandørar.

Klima- og miljødepartementet finansierer utviklinga av fem prosjekt innanfor sirkulærøkonomi. Eitt av desse er Statsbyggs idékonkurranse om akustiske trevegger i nytt regjeringskvartal.