Ved utgangen av fristen, 15. september, hadde Statsbygg fått åtte søknader frå tverrfaglege grupper, og utgangspunktet var at fire til sju grupper skulle veljast ut og inviterast til å vere med i plan- og designkonkurransen.

Evaluert og konkludert

No har Statsbygg evaluert søknadene etter kriteria best kompetanse, erfaring og kapasitet, og konklusjonen er at sju prosjekteringsgrupper skal vere med i konkurransen.

– Vi er glade for å ha fått inn mange gode søknader, og det er positivt at så mange som sju har gått over lista i kvalifiseringa og er klare for finalen, for å bruke ei sportstilnærming. Det er ikkje opplagt i eit så stort og komplisert prosjekt, seier kommunikasjonsleiar Pål Weiby i Statsbygg.

– Med sju deltakarar og sju løysingsforslag vil vi få belyst oppgåva i stor breidde, og juryen vil ha eit tilstrekkeleg tal løysingsforslag med kvalitet å velje mellom.

59 firma

– Med tanke på kompleksiteten i oppgåva og krava i utlysinga, er det naturleg at mange har gått saman om ein søknad. Bak dei sju deltakarane finn vi heile 59 firma, og av desse er det 20 arkitektkontor. Det fortel oss at det er mange gode krefter som skal samarbeide om å finne best mogleg løysing for regjeringskvartalet, seier Weiby.

Ein av dei åtte søkarane vart avvist grunna vurderingar knytte til kvalifikasjonskravet om sikkerheit, og i tillegg manglande forpliktingserklæring.

Plan- og designkonkurransen startar etter planen i desember 2016. Gruppene har fram til mars 2017 på å utarbeide løysingsforslaga sine og blir honorerte med NOK 2 000 000 inkl. mva for dette arbeidet. Ein jury vil vurdere forslaga og kåre to–tre vinnarar. Statsbygg vil deretter forhandle med vinnarane, og den gruppa som har det beste tilbodet samla sett, blir tildelt prosjekteringskontrakt. Løysingsforslaget frå denne gruppa blir lagt til grunn for utarbeiding av skisse- og forprosjekt.

Skisse- og forprosjekt

Statsbygg har fått i oppdrag av Kommunal- og moderniseringsdepartementet å planlegge det framtidige regjeringskvartalet. Først skritt på vegen er å utarbeide ein reguleringsplan og få fram eit rom- og funksjonprogram. Desse er forventa å vere på plass innan utgangen av 2016. Så skal det gjennomførast ein avgrensa plan og- designkonkurranse som legg grunnlaget for det komande skisse- og forprosjektet. Det blir planlagt for stortingsbehandling og såkalla KS2-vurdering i 2019. Byggestart er forventa å vere i 2020.