Knut Jørgensen har leia store bygge- og anleggsprosjekt både i sin noverande jobb i Vedal AS og tidlegare i Jernbaneverket. Oppgåvene har omfatta blant anna Barcode, utbygging av Østfoldbanen og dobbeltspor mellom Skøyen og Asker.

No får 56-åringen ansvar for det viktige arbeidet med å planlegge, prosjektere, bygge, ferdigstille og overlevere eit nytt regjeringskvartal.

– Knut Jørgensen har hatt ansvar for nokre av dei mest kompliserte offentlege prosjekta innan samferdsel, og han har leia eit av dei største byutviklingsprosjekta i landet, i Bjørvika i Oslo. Det er veldig få som har ei slik breidde i kompetansen, og eg er glad for at vi har fått tak i den beste. Det seier Harald V. Nikolaisen, administrerande direktør i Statsbygg.

– Først om åtte til ti år står det nye regjeringskvartalet klart, men planlegginga har alt gått føre seg eit år. Seks konsulent-team har starta arbeidet med utforminga av det nye regjeringskvartalet, og S-blokka er riven. Sjølv om sjølve bygginga ligg eit stykke fram i tid, har det vore viktig å få på plass ein prosjektdirektør alt no.

– Det er viktig at prosjektdirektøren kjem inn tidleg i prosessen for å sørge for kontinuitet, god gjennomføring og sikre det viktige arbeidet i tidlegfasen, seier Nikolaisen.

Knut Jørgensen tar med seg 30 års erfaring frå nøkkelposisjonar innan bygg- og anleggsbransjen når han no begynner i Statsbygg.

– Dette er ein jobb som ikkje er blitt gjort før. Å leie arbeidet med det nye regjeringskvartalet blir utruleg spennande og krevjande. Eg oppfattar Statsbygg som ein veldig kompetent organisasjon med dei beste føresetnadene for å lykkast, seier han.

Knut Jørgensen begynner i Statsbygg 1. juni.