Statsbygg er statens rådgivar når statlege verksemder skal finne eigna lokale. I perioden 2018–2020 har Statsbygg hjelpt med å inngå 31 kontraktar for leige av kontor. Desse kontraktane åleine vil kutte statens leigekostnader med 1 milliard kroner fram til 2029.

Statsbygg hjelper verksemdene med å definere behova sine og sjå på korleis dei jobbar. Det fører til riktige lokale på riktig stad, med areal som er meir effektive og tilpassa verksemda. Vidare er Statsbygg til hjelp ved kontraktsinngåing.

– Vi skal ikkje berre nå økonomiske mål, men også klimamåla. Effektiv arealbruk er avgjerande for å halde bygge- og leigekostnader nede, samtidig som det gir lågare energibruk og reduserer klimafotavtrykket, seier Nikolai Astrup.

Flyttar ut av sentrum

Med nokre unntak skal statlege verksemder som inngår leigekontraktar i marknaden, bruke Statsbygg som rådgivar. Staten skal dei neste fem åra fornye nærmare 1000 leigekontraktar.

Sidan 2017 er over 4000 statlege arbeidsplassar blitt flytta ut av Oslo sentrum. No er fleire verksemder på veg til nye lokale:

Arbeids- og velferdsdirektoratet og UDI og har samlokalisert verksemdene sine på Helsfyr.
Landbruksdirektoratet, Landinfo, Barne-, ungdoms- og familiedirektoratet, Direktoratet for forvaltning og økonomistyring (DFØ) og Digitaliseringsdirektoratet er alle i ferd med eller har flytta ut av Oslo sentrum.
NOREC, BUF-etat region aust og Nasjonalt klageorgan for helsetenestene har flytta ut av Oslo, til høvesvis Førde, Lillestrøm og Bergen.
I tillegg har Utdanningsdirektoratet, Patentstyret, NVE, Riksantikvaren, NOKUT og Statens Jernbanetilsyn starta arbeidet med å finne nye lokale.

– Arbeidsplassane kjem nært der folk bur og er nært kollektivknutepunkt. Det er både samfunnsøkonomisk gunstig og bra for miljøet, seier Nikolai Astrup.