Hovudbygget blei totalskadd og seinare rive, som ei følge av brannen i desember 2021. Statsbygg fekk etter dette i oppdrag av Bufdir å utføre ein moglegheitstudie for eit nytt bygg og tilpassing av attståande bygg på same tomt i Stjørdal.

For eit år sidan underteikna Statsbygg og HENT ein samspelskontrakt, og har sidan då utvikla prosjektet saman. Nå har partane underteikna ein gjennomføringsavtale for å bygge opp igjen barnevernsinstitusjonen.

Kontrakten er ein totalentreprise med fastpris. Etter planen startar bygginga første kvartal 2026 og skal stå ferdig tredje kvartal 2027. Kostnadsramma på 116,2 millionar kroner.

Det nye hovudbygget utgjer størsteparten av prosjektets totale omfang på 1326 kvm. I tillegg skal ein eksisterande paviljong og ei bu blir bygd om. Det skal også byggast ein carport.

– I nybygget har vi vektlagt god arkitektur, fleksible løysingar og robustheit. Prosjektet vil løyse behova til Bufetat på ein svært god måte. Her vil både dei tilsette og ungdommane få trygge rammar, seier prosjektleiar Fabian Fjuk Egge i Statsbygg.

Stjørdal ungdomssenter skal primært ha fire plassar, med moglegheit for utviding til seks. Prosjektet følger arealrettleiaren for barnevernsinstitusjonar, som Statsbygg, Bufdir og Bufetat lanserte i fjor.

– Vi har veldig god erfaring med denne typen rettleiarar frå andre sektorar. Dei gjer at vi kan standardisere prosjekta, noko som igjen fører til reduserte kostnader og tidsbruk. I tillegg sikrar vi god læring til kommande prosjekt, seier Fjuk Egge.

– Dette er eit svært viktig bygg og prosjekt. Med grunnlag i det gode miljøet for samhandling, som er etablert gjennom fase 1, ser vi verkeleg fram til å vidareføre dette og realisere prosjektet, seier prosjektsjef John Magne L. Lyng i HENT.