Med ambisiøse klimatiltak i eigne prosjekt og klare krav til leverandørar leier Statsbygg an i arbeidet med å gjere byggenæringa grønare. No gir satsinga tydelege resultat.

I 2019 vart klimagassutsleppa i prosjekta Statsbygg har under bygging redusert med 36 prosent samanlikna med kva utsleppsnivået ville vore utan klimakrav i Statsbygg sine kontraktar. Til saman utgjer reduksjonane 120.000 tonn CO2-ekvivalentar. Det tilsvarer éin million flyreiser Oslo–Bergen.

– Dette viser at det hjelper å setje tydelege krav og mål. Framover vil vi jobbe endå hardare for å oppnå endå større klimagasskutt, seier administrerande direktør Harald Nikolaisen i Statsbygg.

Kuttene kjem blant anna frå meir bruk av lågkarbonbetong og andre materiale med lågare klimagassutslepp. Andre årsaker er meir bruk av effektiv energiforsyning som varmepumper, fjernvarme og solceller, og tiltak som isolering og ventilasjonsløysingar som reduserer varmetap.

Tre satsingsområde

Utsleppsreduksjonen kjem fram i Statsbygg sin miljørapport for 2019. Her ser Statsbygg kor nært ein er å nå måla i miljøstrategien sin. Målet er å redusere klimagassutsleppa med 40 prosent i løpet av 2020.

I tillegg til klima er sirkulærøkonomi og lokalmiljø satsingsområda i Statsbygg sin miljøstrategi. Også her er Statsbygg på god veg til å nå ambisjonane.

– Sirkulærøkonomi handlar for oss mykje om gjenbruk av bygg, å legge til rette for ombruk, råd om redusert arealbruk, avfallshandtering og oppbygging av kompetanse. Her vil vi bli endå meir ambisiøse i åra som kjem. Vi ser blant anna at vi må få på plass ein god måleindikator for delen ombrukte og resirkulerte materiale, seier Nikolaisen.

Også innanfor Statsbyggs siste satsingsområde, lokalmiljø, er ambisjonane langt på veg innfridde. Eit viktig arbeid i 2020 blir å ferdigstille ein risiko- og sårbarheitsanalyse av alle Statsbygg sine eigedommar, slik at ein kan sjå kva for klimatilpassingstiltak som kan gjerast på kvar enkelt eigedom.