Nybygget gjer at lærar- og pedagogikkutdanningane er samla i moderne undervisningslokale og integrerte med dei andre delane av universitetet på campus i Tromsø. Nybygget skal huse ca. 1 900 heil- og deltidsstudentar innanfor barnehage- og grunnskolelærar, lektor- og pedagogikkutdanning, og i tillegg 176 tilsette.

Arealet som er sett av til undervisnings- og studiefunksjonar er omtrent 4 200 kvadratmeter, og det som skal nyttast til møterom og kontorarbeidsplassar omtrent 1 900 kvadratmeter. Totalt er nybygget på ca. 11 000 kvadratmeter brutto, og er gjennomført innanfor kostnadsramma på 475 millionar kroner.

Bygget er gjennomført som ein totalentreprise med løysingsforslag. Econor AS vann konkurransen og gjennomfører byggearbeida i oppdrag for Statsbygg. Med seg hadde dei arkitektfirmaet Filter arkitekter i Oslo. Som del av totalentreprisen vart det i innleiande fase gjennomført ei plantilarbeiding av løysingsforslaget og eit forprosjekt.

Tilhøyrande infrastruktur og utomhusarbeid er også ein del av prosjektet. Bygget har seks etasjar, og i tillegg ein underjordisk kulvert for å knyte det saman med resten av bygningsmassen på campus Tromsø. Det er sett krav til generalitet og fleksibilitet for framtidige behovsendringar.

Nord-Norges største solcellepanel

Prosjektet hadde som mål å redusere klimagassane med 30 % samanlikna med eit referansebygg. Energiambisjonen for prosjektet tilsvarer passivhusnivå, og det skulle derfor vurderast alternativ og fornybar energiproduksjon (nesten nullenergi). Statsbygg såg derfor vekk frå mørketida og la Nord-Noregs største solcelleanlegg på taket til nybygget for Institutt for lærarutdanning og pedagogikk (ILP). Det er sannsynlegvis blitt verdas største solcelleanlegg nord for polarsirkelen.

Dette er eit klimatiltak, som vil gi oss meir kunnskap om kva utsikter det er for bruk av solceller i nord. Solcelleanlegget er berekna til å gi ei årleg energiinnsparing på 140.000 kWh, og erfaringane så langt er positive. Investeringskostnaden er på ca. 4,5 millionar kroner eks. mva.

Anlegget er langt på veg eit testprosjekt både for UiT og Statsbygg. UiT har alt i dag eit mindre testanlegg for solceller i Tromsø, mens Statsbygg har solcelleanlegg på fleire bygningar lenger sør i landet. Ved testanlegget til UiT er det blant anna dokumentert at låg temperatur aukar effekten av kvar enkelt solcelle. Samtidig speler avgrensa tilgang på lys delar av året negativt inn. På det nye anlegget skal solcellene ligge med låg vinkel for å fange lyset over størst mogleg del av døgnet.