Som nærmaste nabo til det nye Nasjonalmuseet har den såkalla Trekanttomta på Aker Brygge i Oslo uvanleg stort potensial for eigedomsutvikling. Etter ein bodprosess med mange interesserte tente staten over 1,2 milliardar kroner då den vart seld til Ferd Eiendom og Vedal rett før jul.

– Med omsyn til både økonomi og berekraft må staten heile tida gjere ei kritisk vurdering av kor mykje eigedom som trengst. Eigedommar det ikkje er behov for lenger, blir seld slik at framleis bruk og utvikling av eigedommane er sikra. Salsinntektene kan brukast på andre formål som kjem fellesskapet til gode, seier administrerande direktør Harald Nikolaisen i Statsbygg.

Fleire andre store eigedomssal gjorde 2020 til eit rekordår for Statsbygg. I Oslo gav Skådalen kompetansesenter, Sophies Minde ved Aker sykehus og ei tomt på Huseby salsinntekter på til saman ca. 500 millionar kroner.

I Trondheim vart Statsbygg og Trøndelag fylkeskommunes sal av utviklingseigedommen Brøset gjennomført i juni. Den 340.000 kvm store eigedommen ligg fire kilometer aust for sentrum. Områdeplanen legg opp til at det kan byggast ca. 1700 bustader der. Statsbygg sin del av salssummen utgjer ca. 400 millionar kroner.

Andre eigedomssal som førte til rekordinntekter i 2020 inkluderer blant anna:

Den gamle lærarhøgskolen i Tromsø
Lierskogen mottak
Porsgrunn tollbod
Sandefjord fengsel
Sørvaranger Politimeisterbustad
Tronka i Trondheim
Bustadtomter i Alta
Ei leilegheit i Kiev i Ukraina
Mjøsvoll barne- og ungdomssenter
Fleire utmarkseigedommar i Levanger