– Situasjonen i Oslo fengsel er alvorleg, og fengselet har eit svært stort vedlikehaldsbehov. Nytt Oslo fengsel er derfor ei viktig prioritering for regjeringa. Vi har jobba med alternativ på Bredtveit og Grønland. Når signala frå Oslo kommune er tydelege på at dei ikkje ønsker dette, så lyttar vi og legg vekk Grønlands-alternativet og legg Bredtveit på is, slik at vi tar ein ny runde på kvar fengselet bør ligge, seier justis- og beredskapsminister Monica Mæland (H).

– No som Statsbygg set i gang eit tomtesøk, håper eg på eit godt samarbeid med kommunane rundt Oslo. Vi har derfor invitert 24 kommunar til eit informasjonsmøte, slik at vi kan få ei best mogleg løysing for kriminalomsorga i åra som kjem, seier Mæland.

Statsbygg stiller krav om at ei tomt utanfor Oslo bør vere på minst 65 mål. Storleiken på tomta og opning for utviding vil bli vektlagt. Innanfor Oslo sine grenser kan noko mindre tomter vurderast. Tomta bør i tillegg ha god tilgang og vere lett å bygge på.

Det er også viktig at eit nytt Oslo fengsel ligg i akseptabel køyretid frå Oslo sentrum. Køyretid bør ikkje overstige 45 minutt frå Oslo sentrum.

Tomtesøket vil bli annonsert i papiraviser laurdag 3. juli, og på nytt over ferien laurdag 14. august. Informasjonen om tomtene skal framstillast på ein eigen mal som Statsbygg har utarbeidd.

Fristen for å gi tilbod og sende inn beskriving av aktuelle eigedommar er torsdag 2. september 2021. For spørsmål og for å få tilsendt mal for utfylling, kontakt spesialrådgivar Olav Magnus Moen, tlf. 916 39 603, e-post OlavMagnus.Moen@statsbygg.no til og med 30. juli, deretter eigedomsrådgivar Jørgen Weng, tlf. 415 26 969, e-post Jorgen.Weng@statsbygg.no.

Utfylt mal for aktuelle eigedommar skal sendast til Statsbygg per e-post til postmottak@statsbygg.no merkt med 2021/2546 Nytt Oslo fengsel med kopi til e-post Jorgen.Weng@statsbygg.no.

Informasjon om tomt framstilt i samsvar med mal frå Statsbygg.