Statsbygg skal også anskaffe nødvendige tilleggsareal til Bergen tinghus. No er HENT AS engasjert i ein samspelskontrakt for å utarbeide forprosjekt.

Samspelet startar opp i august og varer fram til sommaren 2022. I første samspelsfase skal partane legge planane og utarbeide eit forprosjekt for rehabiliteringa og ombygginga av tinghuset. Dersom forprosjekt og dei økonomiske rammene blir godkjende, er planen å gå vidare til andre samspelsfase som inkluderer detaljprosjektering og bygging.

– Tinghuset har ein sentral plass i Bergen by og byens historie. Vi ser fram til å gje Domstoladministrasjonen tidsriktige lokale, samtidig som vi i totalrehabiliteringa skal ha omtanke for den kulturhistoriske verdien bygningen har, seier avdelingsdirektør Madeleine Torkveen Skjølås, som har ansvar for Statsbygg sine byggeprosjekt i justissektoren.

Bergen tinghus er teikna av arkitekt Egill Reimers. Tinghuset har adressa Tårnplassen 2, og har eit areal på ca. 12.500 kvm. Bygningen er freda. Fredinga omfattar både eksteriør og delar av interiør, som spesialteikna møblar og laust inventar. Både lokale og nasjonale vernestyresmakter er ein viktig aktør i samspelet, og alle planar vil bli gjort i tett samarbeid med vernestyresmaktene.

Eit effektivt og sikkert tinghus

Bergen tinghus frå 1933 er nedslite og lite funksjonelt, og eignar seg ikkje til moderne domstoldrift.

– Igangsetting av forprosjektet er eit viktig steg vidare med sikte på å etablere ei ny tinghusløysing i Bergen. Eit rehabilitert bygg vil bidra til meir effektiv saksavvikling og auke sikkerheita til brukarane og dei tilsette i tinghuset, fortel Skjølås.

Det skal også anskaffast mellombelse lokale for Bergen tingrett i gjennomføringsperioden på tre år.

I det nye tinghuset er det behov for mellom 22 og 27 rettsalar med tilhøyrande funksjonsareal, publikumsfunksjonar og areal til arrest og politi. Det skal innehalde arbeidsplassareal for 117 personar.

Bygget skal få ny hovudinngang som varetar dagens krav til universell utforming og sikkerheit. Det tekniske anlegget treng også ei total oppgradering slik at det er i samsvar med dagens forskriftskrav.