– Staten skal investere i eigedommane vi treng og selje dei vi ikkje har bruk for. Eg trur at dette salet vil bidra til positiv utvikling av området, samtidig som staten får inntekter som vi kan bruke til andre gode formål, seier Nikolai Astrup, kommunal- og moderniseringsminister (H).

Den trekantforma tomta på 4,5 mål ligg sentralt plassert mellom det nye Nasjonalmuseet og Aker Brygge. Staten eig ca. 80 prosent av tomta, mens Oslo kommune eig resten. Tomta er i dag regulert til utbygging av 24.000 kvadratmeter bruttoareal med opning for å bygge blant anna bustad, kontor og offentlege formål.

Statsbygg har jobba med salet sidan regjeringa i vår vedtok at tomta skulle seljast. Ei rekke eigedomsaktørar melde interesse då bodprosessen starta for ein månad sidan. Bodrunden resulterte i ein langt høgare pris enn forventa.

No er bodet frå eit partnarskap mellom Ferd Eiendom og Vedal på 1,5 milliard kroner for Trekanttomta akseptert.

– Dersom Stortinget gir auka salsfullmakt, vil dette gi staten ein salsgevinst på om lag 1,2 milliardar kroner, som no kan brukast på andre gode formål. I tillegg trur eg Ferd Eiendom og Vedal vil kunne utvikle tomta til det beste for innbyggarane i byen, seier Astrup.

Høge klimaambisjonar

Ferd Eiendom og Vedal ønskjer å utvikle eit prosjekt som forsterkar bystrukturen i området.

– Vi vil skape eit prosjekt til det beste for byen og utviklinga av den. No ser vi fram til å ta utviklings- og gjennomføringsansvar for ei av dei mest sentrale utviklingstomtene i Oslo i nært samspel med fagetatane og planmyndigheitene i kommunen, seier Camilla Krogh, administrerande direktør i Ferd Eiendom.

I forretningsplanen til Ferd Eiendom ligg det høge ambisjonar knytt til berekraft. Som seljarar deler Statsbygg og Oslo kommune dei ambisjonane:

– Vi stiller tydelege krav til klima og miljø når vi bygger sjølv, og gjer det same for eigedommane vi sel. Trekanttomta har det høgaste ambisjonsnivået for berekraft vi har hatt i ein salskontrakt nokon gong, seier administrerande direktør Harald Nikolaisen i Statsbygg.

– I tillegg til å fullføre byutviklinga i dette sentrale området i hjartet av Oslo er vi spesielt nøgde med dei høge miljøambisjonane vi har sikra gjennom salsavtalen med ny eigar, seier direktør i Eiendoms- og byfornyelsesetaten i Oslo kommune, Eskil Bråten.

Må godkjennast formelt

Trekanttomta har dei seinaste åra blitt brukt som anleggsplass for det nye Nasjonalmuseet. Både staten og Oslo kommune har akseptert bodet på sine areal, men salet er ikkje formelt godkjent.

Regjeringa vil no be Stortinget om auka salsfullmakt, slik at salet kan sluttførast. Ein tar sikte på å gjennomføre salet i 2020.