– Eg gleder meg til å finne tre nye direktørar, som skal vere med å forme Statsbygg i åra som kjem. Eg ser fram til å bli kjent med gode kandidatar, og er sikker på at det vil vere stor interesse for stillingane, seier administrerande direktør Øystein Børmer i Statsbygg.

Rekrutteringsarbeidet leiast av rådgivarane våre i BackerSkeie.

Byggherredirektør

Stillinga som byggherredirektør blir lyst ut etter at den tidlegare direktøren vår i haust gjekk over i ny jobb.

Byggherredirektøren har ansvar for vidareutvikling av statens byggherreverksemd og for å sikre effektiv gjennomføring av prosjekt i dialog med blant anna oppdragsdepartement og statlege verksemder. Byggherredirektøren leiar Byggherreavdelinga med om lag 210 tilsette og vil ha ein sentral rolle i å vidareutvikle Statsbygg.

Her kan du lese meir om stillinga og søke.

HR-direktør

Stillinga som HR-direktør lysast ut etter at den nåverande direktøren vår går av med pensjon.

Som HR-direktør får du det overordna ansvaret for arbeidsgivarrolla og heilskapleg arbeidsgivarpolitikk. Du leiar ein HR-stab på 11 tilsette og har overordna ansvar for organisasjonsutvikling, leiing, HMS, kompetanseutvikling, rekruttering, lønn og styringsdata i selskapet. Stillinga gir stor påverknadskraft og ei unik moglegheit til å vidareutvikle Statsbygg som ein attraktiv, profesjonell og framtidsretta arbeidsgivar.

Her kan du lese meir om stillinga og søke.

Kommunikasjonsdirektør

Stillinga som kommunikasjonsdirektør blir lyst ut etter at den nåverande direktøren vår ønsker å utforske nye utfordringar i verksemda.

Som kommunikasjonsdirektør får du ei sentral rolle i å styrke Statsbygg si synlegheit og omdømme, og for at rolla til verksemda som statleg byggherre, eigedomsforvaltar og rådgivar blir formidla klart og profesjonelt til interne og eksterne målgrupper. Kommunikasjonsdirektøren leiar ein stab på 10 medarbeidarar og er ein sentral strategisk rådgivar for Statsbygg si leiing.

Her kan du lese meir om stillinga og søke.