Statens lokale er avgrensa til statleg sivil sektor og eigedommar innanfor grensene av Noreg. Dette ekskluderer blant anna lokala til Forsvarsdepartementet og underliggande verksemder, og statleg verksemd organisert som eigne rettssubjekt – medrekna helseføretaka, statlege stiftingar og statleg eigde ASA.

I 2020 blei det gjennomført ei ekstern kvalitetssikring av innhaldet i databasen. Det blei konkludert med at 2019 kan brukast som referanseår. Vi er derfor trygge på at dei fleste av endringane frå 2019 til 2020 på eit overordna nivå er uttrykk for reelle endringar.

Alle dashborda presentert i rapporten finn du samla her.

Kvar kjem tala frå?

Tala blir i hovudsak henta inn ved at statlege verksemder rapporterer årleg til basen, dette skjer i 1.kvartal for føregåande år. Denne informasjonen blir kombinert med data frå blant anna matrikkelen, Brønnøysundregisteret, SSB og Miljømerket. Tala til rapporten for i år blei trekte ut frå basen 31.03.2022. Endringar gjort i databasen etter denne datoen har ikkje komme med i rapportgrunnlaget.

Feilkjelder og datakvalitet

Informasjonen tatt frå databasen bør behandlast med bevisstheit om definisjonane som ligg til grunn for rapporteringa. I Statens lokale er det definert to typar lokale: kontorlokale og ikkje kontorlokale. Kontorlokale skal innehalde dei same funksjonane, og kan i stor grad samanliknast. Ikkje kontorlokale er ein samlekategori for alle andre typar lokale, med større andel spesialtilpassa areal, og kan ha mange brukarar utover eigne tilsette. Det kan også vere lokale utan tilsette. I mange bygg vil kontorlokale og ikkje-kontorlokale vere delar av same areal.

Det blei for tala 2021 gjennomført endringar i rapporteringsmetoden til UH-sektoren. det inneber at tala for sektoren ikkje kan samanliknast med tidlegare år. Det same gjeld for Staten vegvesen og fleire direktorat i UH-sektoren som har gjennomført strukturendringar.

Frå nokre leigetakarar, som politiet og andre med ekstra sikkerheitsbehov, bør tala brukast med varsemd, sidan nokre eigenskapar ved enkelte lokale ikkje kjem fram i databasen av sikkerheitsomsyn.

Rapportering til energimerkeordninga er berre pålagt for næringsbygg over 1000 kvm. Derfor er ikkje miljømerke og energikarakter tilgjengeleg for alle lokala i databasen (73 %).

100 % av verksemdene har rapportert. 99,98 % av verdien på lokala og 98,8 % av lokala. Det manglar rapportering frå 28 mindre lokale og lager hos Kystverket, totalt til ein kostnad på 3,5 millionar.

Openheit

Informasjon om forretningsvilkår og leigeprisar i enkeltkontraktar er ikkje opent tilgjengeleg, i og med at dette er rekna for å verke inn på konkurranseforholda for statens forhandlingsposisjon ved inngåing av kontraktar. Det blir derfor ikkje publisert tal for geografiske område med færre enn 15 leigekontraktar. På verksemdsnivå er tala for verksemda tilgjengeleg, sjølv om verksemda har færre enn 15 leigekontraktar. Statsbygg er til hjelp med å legge til rette innsamla data for dei verksemdene som ønsker det.